H股

過去一個禮拜喺金魚缸啄下啄下都應該發咗達，港股的凌厲升勢係筆者在業內幾十年嚟從未見過咁大場面，個局靚到暈陀陀！一啲細隻的內房股都升咗成三倍，認真罕見。中國恒大（3333）同碧桂園（2007）因為仍然停牌，小股東得個睇字，都係無可奈何，真係戥佢哋慘。

港股今日繼續過去一個禮拜個升勢，恒指高開高收，全日升咗1,300幾點，成交4,300幾億，估計個市仲有排升。內地而家放緊國慶假期無開市都已經係咁升，放完假返嚟個市仲唔繼續砰碐磅硠？照咁睇個市仲會升，但升到去邊真係無人夠膽預測到。

香港股市有個好處，就係反彈時完全無上限。而今個市基本上投資者都係鍾情H股，本地上市公司的股價郁動反而較小，當然如果同H股一樣喪升，亦唔一定係好事。說明而家港股的玩法完全轉晒。香港亦要檢視一下形勢，點樣順應股票市場上的新格局。如果恒大同碧桂園可以復牌，小股東一定謝天謝地。

今次升市除咗內地的組合拳奏效之外，加上美國佬不斷唱衰中國同香港，外資行聽晒話不斷沽空港股，最後個底畀人兜晒，而家見勢色唔對，芬佬要補倉而出現冚倉式反彈，越升越要買，為港股升勢火上添油。咁熾熱的氣氛真係難得一見。假如股市繼續挾上去，六個月後內地的經濟指標一定好靚麗。

個市咁靚仔，大家都皆大歡喜。內地不少人趁住國慶假外出旅遊，估計呢個國慶假係2020年疫情以來市面最旺的一個長假期。縱然大家慳住使，但實惠消費品的銷量就十分龐大。政府已經講明，隨時會再度減息，估計會更加刺激消費，對整個社會都會帶嚟生氣同動力。

深入閱讀政經生活文化，更多內容盡在：